Balozi Ali Karume amulikwa na kurunzi ya maadili ya CCM.

Mwanasiasa na mwana diplomasia nguli hapa nchini, Balozi Ali Karume ambaye pia ni mtoto wa mwasisi wa mapinduzi matukufu ya Zanzibar Rais Abeid Aman Karume katika siku za hivi karibuni amejikuta matatani kutokana na kauli zake zenye ukakasi dhidi ya chama cha CCM na Serikali ya Mapinduzi ya Zanzibar kwa ujumla wake.

Hatua hiyo inatokana na onyo alilopewa na kamati ya siasa ya Halmashauri Kuu ya CCM Jimbo la Tunguu, Mkoa wa Kusini Unguja iliyokutana Juni 15, 2023.

Balozi Karume aliwekwa “kiti moto” na kamati ya maadili ya jimbo hilo kutokana na kauli zake alizozitoa kwenye mitandao ya kijamii akikituhumu chama kuwa hakijawahi kushinda kihalali kisiwani humo na kumkosoa hadharani Rais Hussein Mwinyi kuhusu sera zake za kukodisha visiwa.

Pia alipinga utaratibu wa wananchi wa Kilimani kuondolewa kujenga ukumbi wa kimataifa na ujenzi wa uwanja wa Amani akidai vinakiuka utaratibu.

Juni 11, katika moja ya mikutano yake, Makamu Mwenyekiti wa CCM na Rais wa Zanzibar, Hussein Mwinyi aliiagiza kamati ya maadili kuwashughulikia makada wanaokwenda kinyume na taratibu huku akihoji kwanini bado wako ndani ya chama.

“Wakati umefika kwa kamati ya maadili kufanya kazi yake, una sababu gani ya kubaki kwenye chama hiki, ikiwa hupendi chama ondoka! Nenda ukaseme hayo maneno ukiwa nje ya chama, unahoji hata ushindi wa CCM!” aliwaambia wafuasi bila kumtaja mtu.

Kwa mujibu wa barua ambayo Mwananchi limeiona iliyosainiwa na Katibu wa CCM jimbo la Tunguu, Sharifa Maabadi Othman, bila kutaja muda, inaeleza chama kumpa onyo hilo kwa ukiukwaji wa maadili.

“Pamoja na mambo mengine kikao kilipokea taarifa kutoka kamati ya maadili ya jimbo kuhusu mahojiano yaliyofanyika juu ya Balozi Ali Abeid Karume na kamati ya maadili ya jimbo, baada ya kukiri makosa yake mbele ya kikao hicho, aliomba msamaha, hivyo basi kikao kimeamua kukupa onyo kwa kukiuka maadili ya chama chetu,” inaeleza sehemu ya barua hiyo.

Hata hivyo, alipo ulizwa katibu huyo Sharifa kuhusu hatua hiyo, licha ya kusema hawezi kuzungumza chochote kwa sababu yaliyofanyika ni vikao vya ndani, alikiri barua hiyo ni halali.

katika kuthibitisha kuwa kuna msuguano wa kimawasiliano kati ya Balozi Ali Karume na uongozi wa chama jimboni, alisema naye ameona barua hiyo kwenye mtandao wa kijamii, na akasema ikimfikia atatii maadili ya chama.

Balozi Karume alihojiwa na kamati ya maadili ya tawi la Mwera, kamati ya maadili ya Jimbo la Tunguu na kamati ya maadili ya Wilaya ya Kati.

Barua aliyopewa Karume ni kwa mujibu wa kanunzi za uongozi na maadili za CCM na jumuiya yake toleo la mwka 2021 ibara ya (8) kifungu kidogo (a) (ii).

Nakala ya barua hiyo ilikwenda kwa Katibu wa CCM wilaya ya Kati na Katibu wa CCM Mkoa wa Kusini Unguja.

Kutokana na kanuni hiyo mwanachama anayekiuka maadili ya chama anapewa onyo, onyo kali au kufukuzwa uanachama huku kukiwa na muda maalumu wa uangalizi kuanzia miezi mitatu, sita na mwaka mmoja.

Mmoja wa watu wa ndani ya chama hicho ambaye hakutaka kutajwa alisema iwapo kikipita kipindi cha uangalizi bila kuonyesha mabadiliko, wilaya itatoa mapendekezo kwenda ngazi ya mkoa kwa hatua zaidi.

Mapendekeo hayo yanaweza kuwa kumfukuza uanachama kiongozi huyo.

Akizungumza na gazeti hili mchambuzi wa masuala ya kisiasa Zanzibar, Ali Makame alisema hatua iliyochokuliwa ni sawa kwa sababu lengo la kila chama ni kuishika dola, lakini kuna taratibu za kufuata katika kuzungumza.

“Ukiangalia huyu ni mtoto wa muasisi wa taifa hili na chama chake, kwa hiyo anajua mengi, madhaifu na mazuri ya chama, lakini kutoka hadharani na kuanza kusema vile si uungwana, kama unapinga tumia utaratibu wa chama unapotoka nje unakuwa utovu wa nidhamu,” alisema

Hata hivyo, alisema hatua zilizochukuliwa na chama hicho ni jambo la kujifunza hasa kwa watu wengine kwa sababu linaweza kuwagawa wanachama na viongozi, hivyo kuwaondoa kwenye lengo la chama kama kikundi chenye dhamira moja.

Taarifa hii ni kwa hisani ya ; 

Jesse Mikofu

Mwandishi wa Habari - Mwananchi